صحافة المواطن

لو راجع السودان وعايز توفر قروش وما عايز ترجع برجعة الطوعية الكلام ده مهم شديد للأسر الكبيرة ❤️

أسعار الباصات بقت نار والتجار الجشعين خلو سعر التذكرة للراكب الواحد حوالي ٤٠٠٠ جنيه
لكن في طريقة بسيطة وساهلة ممكن تنزل ليك التكلفة لحدي ٢٦٠٠ تقريباً يعني توفير حوالي ١٤٠٠ جنيه في التذكرة الواحدة

لو أسرة مكونة من ٥ أفراد ممكن توفر حوالي ٧ ألف جنيه مصري وتستفيد بيها في طريقك أو بعد ما تصل السودان

كل العليك تمشي محطة قطارات الجيزة أو محطة رمسيس
ومن هناك تسافر عادي جداً لحدي أسوان ومافي أي مشكلة ومافي زول ح يسألك

أقطع تذكرة في القطر الروسي العادي وسعرها حوالي ٢٣٠ جنيه

الحاجة المهمة شديد حاول تطلع في القطارات البتتحرك من القاهرة صباح أو ظهر عشان تصل أسوان قبل صلاة الفجر
ودي نقطة مهمة لأنو الباصات المتجهة لمعبر أرقين بتتحرك بعد الفجر مباشرة

أول ما تنزل من محطة أسوان ما محتاج تاكسي ولا شيال ولا عتال
أطلع على يدك اليمين تلقى المبنى اللاصق بالمحطة مباشرة
في شركة اسمها نيو باص للشحن عندهم باصات جديدة وحديثة بتوصلك لمعبر أرقين بحوالي ٦٥٠ جنيه

بعد ما تصل أرقين ح تلقى خيارات كتيرة جداً وأسعار مختلفة حسب العربية والمدينة الانت ماشي ليها
تقدر تقطع من أرقين للخرطوم بحوالي ١٦٠٠ أو ١٧٠٠ جنيه

يعني الحساب تقريباً
٢٣٠ القطر
٦٥٠ الباص
١٧٠٠ من أرقين للخرطوم
المجموع حوالي ٢٦٠٠ جنيه فقط

وقروشك الباقية في جيبك بدل ما تمشي لي تجار الأزمات والمستغلين البقوا يضغطوا على الناس في ظروف صعبة شديد 💔

ممكن كمان تتفق مع السواق ينزلك في دنقلا أو أي مدينة في الطريق لو داير

البوست ده محاربة للجشع وما أي زول يستغل ظروف الناس وتعبهم
وربنا يسهل طريق كل زول راجع لي أهلو وبلدو سالم ❤️